У Қирғизистонда 10 йилга озодликдан маҳрум қилинган, бироқ пробация шарти билан озод қилинган эди.
Украинадаги жанговар ҳаракатларда Россия томонида қатнашгани учун Қирғизистонда қамалган Асқар Кубаничбек уулу Россиядан сиёсий бошпана олди. Бу ҳақида Россия Ички ишлар вазирлигининг вакили Ирина Волк 27 апрель куни ўзининг Телеграм-каналида хабар берди.
30 ёшли жангари Қирғизистонда «ёлланганлик» моддаси бўйича 10 йилга озодликдан маҳрум қилинган, бироқ кейинчалик пробацион назорати шарти билан озод қилинган эди.
Бишкекдаги Первомайск туман судида Озодликка маълум қилишларича, пробацион назорат шартларидан бири мамлакатдан чиқмаслик эди.
Асқар Кубаничбек уулунинг ўзи россиялик журналистларига берган интервьюсида суд ҳукмидан сўнг Қирғизистонни Қозоғистон орқали тарк этганини ҳамда эндиликда Россияда яшамоқчи эканини айтган.
Қирғизистонлик жангари 2023 йил январь ойи ўрталарида қўлга олинган эди. Май ойида у ёлланма жинояти учун 10 йилга озодликдан маҳрум этилди – фуқаро, терговчиларга кўра, Украина ҳудудида Россия қўшинлари таркибида жанг қилган ва унга қарши ҳудуддаги қуролли можарода иштирок этгани учун иш очилган. Бу ҳукм Россиянинг Украинага кенг кўламли тажовузи бошланганидан бери Қирғизистонда биринчи бўлди.
Январь ойида яна бир қирғизистонлик “Вагнер” ХҲК сафида Украинадаги урушда қатнашгани учун 5 йилга озодликдан маҳрум қилинган эди.
Россиянинг Украинага босқинида кўплаб қирғизистонликлар, асосан Россия қамоқларидаги қирғиз маҳбуслар иштирок этмоқда. ОАВда Украинада ҳалок бўлган қирғизистонликлар ҳақида хабарлар мунтазам берилмоқда.
