Курашчи Қамчи Асанбек ва унинг шерикларининг “ноқонуний йўл билан орттирган мол-мулкини хатлаш” доирасида қўлга олинган.
Қирғизистон Миллий хавфсизлик давлат қўмитаси 30 октябрь куни таниқли курашчи Мурат Рамоновнинг ҳибсга олинганини маълум қилди.
Махсус хизмат маълумотларига кўра, курашчи ўғрибоши Қамчибек Колбоев (Қамчи Асанбек) ва унинг шерикларининг “ноқонуний йўл билан орттирган мол-мулкини аниқлаш” доирасида қўлга олинган.
“Аниқланишича, Мурат Рамонов Қамчи Асанбекнинг жиноий йўл билан қўлга киритган мол-мулкини «ювиб бериш» мақсадида ўз номига расмийлаштган ва кейинчалик ушбу мулкни баъзи сиёсатчиларга ўтказиб берган”, — дейилади МХДҚ баёнотида.
Шунингдек, МХДҚ “ собиқ бош вазир Сапар Исаков қамоқдан озод этилгач Қамчи Асанбекнинг уюшган жиноий гуруҳи аъзолари унга инъом этган” Мерседес-Бенц С600 зирҳли автомобилни мусодара қилган. Кейинчалик, 2020 йилнинг 5 октябрь куни Сапар Исаков баъзи сиёсатчилар билан тил бириктириб Ала-Тоо марказий майдонида оммавий тартибсизликлар уюштиришда ушбу автомобилдан фойдаланган”, — дейилади баёнотди.
Мурат Рамонов Қирғизистоннинг 12 карра чемпиони, юнон-рум кураши бўйича Осиё чемпионати совриндори. 2016 йилда Риодаги Олимпиадада Қирғизистон номидан иштирок этган.
