Ушбу жиноий кланга алоқадор яна бир нечта киши ҳибсга олинди.
Қирғизистон Миллий хавфсизлик давлат қўмитаси 11 октябрда маълум қилишича, Юнон-рум кураши федерацияси вице-президенти қўлга олинди. У уюшган гуруҳ тузиш ёки унинг ишида иштирок этишда гумонланмоқда.
Махсус хизмат берган маълумотларга кўра, тўлиқ шарифи ошкор қилинмаган И.А.Х. исмли шахс «жиноий дунёнинг «общагига» ўлпон йиғишда иштирок этган ҳамда Қамчибек Колбаевнинг уюшган жиноий гуруҳи фаолиятини молиялаштирган».
Расмий маълумотларга кўра, 2018 йилдан буён Юнон-рум кураши федерацияси вице-президенти лавозимида Иминов Ахрор Хикматиллаевич ишлаб келмоқда.
Шунингдек, ўғрибоши Қамчибек Колбаев кланига алоқадорликда гумонланиб яна икки киши қўлга олинган. Биринчиси, 1969 йилда туғилган тадбиркор Олег Подобедовнинг уйи ва ишхонасидаги тинтув чоғида қуроллар ва молиявий ҳужжатлар топилган.
Қўлга олинган иккинчи шахс Қамчибек кланининг фаол аъзоси Казбек Билаловдир. Жиноий оламда у Қора Казбек номи билан машҳур. Қора Казбек аввалроқ ўғрилар қонунига биноан эмас, давлат қонунчилиги бўйича яшашини билдирган эди.
Аввалроқ маҳаллий ОАВ ўз манбаларига таяниб хабар беришича, ўғрибоши Қамчибек Колбаевнинг қудалари ҳам жиноий гуруҳ тузиш бўйича қўзғатилган жиноят иши доирасида қамоққа олинган.
Қирғизистон махсус хизматлари 4 октябрь куни Бишкекда ўтказган амалиётда Қамчибек Колбаев ўлдирилган эди. Колбаев уюшган жиноий гуруҳ бошлиғи сифатида Қирғизистон ички ишлар вазирлиги ҳисобида турган.
2012 йилда АҚШ уни йирик наркобарон деб топиб, собиқ Иттифоқ мамлакатларининг 10 нафар криминал авторитети қаторида “қора рўйхат”га киритган.
2021 йил март ойида эса Давлат департаменти Колбаевни қўлга олиш, жазога тортиш, шунингдек, у асос солган жиноий гуруҳнинг молиявий схемасини йўқ қилишга кўмак берувчи маълумот учун мукофотни 5 миллион долларга оширган.
Бишкекда отиб ўлдирилган ўғрибоши “Братский круг” халқаро жиноят ташкилотининг Қирғизистондаги шўъбаси раҳбари деб кўрилган.
