2010 йилнинг июнь воқеаларида милиция ходимларини ўлдирганликда айбланиб, қидирувда бўлган қирғизистонлик ҳорижда қўлга олинган. У Ўш вилоятидаги оммавий тартибсизликларда қатнашиш, ҳуқуқ-тартибот идоралари ходимлари ва Мудофаа вазирлиги ҳарбий хизматчиларини шафқатсизлик билан ўлдиришда гумон қилинмоқда. Бу ҳақда Қирғизистон Миллий хавфсизлик давлат қўмитаси матбуот хизмати хабар берди.
Қўлга олиш 17 август куни хорижий давлат ҳудудида амалга оширилган. Ўш вилоятининг Қорасув туманида туғилган, 1973 йилда туғилган Х.Д.А. самолётда Қирғизистонга олиб келиниб, янгиланган жиноят иши доирасида Ўш шаҳридаги 5-СИЗОга жойлаштирилди.
Қирғизистон Миллий хавфсизлик давлат қўмитаси 2010 йилнинг июн ойида содир бўлган ва кўплаб қурбонларга олиб келган воқеаларнинг ташкилотчилари ва фаол иштирокчиларини аниқлаш ва жавобгарликка тортиш бўйича комплекс тезкор-қидирув тадбирларини ўтказаётганини эслатиб ўтади. 2010 йилнинг июн ойида ўта оғир жиноят содир этган шахсларга нисбатан даъво муддати қўлланилмайди.
