Бишкекда 250 дан ортиқ троллейбус ҳайдовчиси иш ташлашда қатнашмоқда. Улар маошни оширишни талаб қилмоқда.
“Биз иш ҳақи билан боғлиқ муаммолар туфайли иш ташлаяпмиз. Барча йўналишлар тўхтатилган, ҳайдовчилар боғда тўпланишмоқда. Бизда ҳал қилиниши керак бўлган муаммолар кўп”, – дейди ҳайдовчилардан бири Светлана Турғунбоева.
Азаттиқ мухбирининг хабар беришича, Бишкек троллейбус бошқармаси коммунал корхонаси раҳбари Талантбек Капаров ҳайдовчилар билан учрашган.
10 август куни юзга яқин троллейбус ҳайдовчиси ишдан бўшатиш тўғрисида ариза ёзгани хабар қилинган эди. Улар бор-йўғи 20-28 минг сом (тахминан 220-320 АҚШ доллари) маош олганликларидан шикоят қилиб, маошларини оширишни талаб қилишган.
Ҳайдовчиларнинг таъкидлашича, троллейбуслар суғурталанмагани боис, троллейбусларда фавқулодда вазиятлар юзага келганда ҳайдовчилар етказилган зарарни ўз маблағлари ҳисобидан қоплашга мажбур бўлмоқда.
Олдинроқ Талантбек Капаров Азаттиққа 9 август куни троллейбус ҳайдовчилари билан учрашув бўлиб ўтгани ва сентябрдан уларнинг иш ҳақи 110 фоизга оширилишини айтган эди. Унинг айтишича, “йўл ҳақи нақд пульсиз ҳисоб-китобларга ўтказилгандан сўнг, янги йилдан кейин маош яна кўриб чиқилади”.
Бишкек ҳокимлиги йўлкира тўловларини электрон шаклда қабул қила бошлашини эълон қилганидан сўнг жамоат транспорти ҳайдовчилари норозилик билдиришди.
Аввалроқ шаҳар ҳокимлиги 20 августдан бошлаб жамоат транспортида нақд пул қабул қилинмаслигини маълум қилганди. Унга кўра, йўловчилар фақат «Тулпар», «Visa», «Элкарт» электрон карталари орқали, QR код ёки мобил илова орқали йўл ҳақини тўлашлари мумкин.
