Қирғизистон Фавқулодда вазиятлар вазирлигининг навбатдаги қутқарувчилар гуруҳи зилзила қурбонларига ёрдам кўрсатиш учун 12 февраль куни Туркияга жўнаб кетади. Бу ҳақда Президент ва Вазирлар Маҳкамасининг Жогорку Кенешдаги вакили Алмасбек Абитов маълум қилди.
Парламентнинг 9 февраль куни бўлиб ўтган йиғилишида депутат Нуржигит Қодирбеков Туркияга зилзиладан жабр кўрганларга ёрдам бериш учун кўнгиллиларни юборишни таклиф қилди. Бироқ депутатнинг таклифига жавобан Алмасбек Абитов Туркияга фақат махсус тайёргарликдан ўтган қутқарувчилар юборилиши мумкинлигини таъкидлади.
“Туркиядаги қутқарув ишларида фақат сертификатланган қутқарувчилар иштирок этиши мумкин. Шу кунгача Фавқулодда вазиятлар вазирлигининг 67 нафар қутқарувчиси уч кундан буён қардош Туркияда ишламоқда. Шу якшанба куни яна 100 нафар қутқарувчи махсус самолётда Туркияга жўнатилади”, — деди у.
BBCнинг сўнгги маълумотларига кўра, Туркия ва Суриядаги энг йирик зилзилалар қурбонлари сони 16 минг кишидан ошган. Вайроналар остида ҳамон қурбонлар бор, уларни қутқаришга ҳаракат қилинмоқда.
Жаҳон соғлиқни сақлаш ташкилоти прогнозларига кўра, икки давлатда зилзила қурбонлари сони 20 мингдан ошиши мумкин.
Туркия ва Сурияда 2023 йил 6 февралда кетма-кет зилзилалар содир бўлди. 7,8 магнитудали биринчи зилзила маркази Газиантепнинг (Туркия) Шеҳиткамил туманида бўлган. 7,5 магнитудали иккинчи зилзила эпимаркази Қаҳраманмараснинг (Туркия) Экиносо ҳудудида жойлашган.
