15 июль куни Ўш вилоятининг Аравoн туманида Daewoo Matiz енгил автомобили Фарғона каналига қулаб тушди.
Қирғизистон Фавқулодда вазиятлар вазирлиги маълумотига кўра, автомашина ичида икки нафар одам бўлган. 2009 йилда туғилган йўловчи мустақил равишда автомашинадан чиқиб кетишга муваффақ бўлган. Унинг аҳволи барқарор деб баҳоланган.
1981 йилда туғилган ҳайдовчини эса автомобиль билан бирга сув оқими олиб кетган. Уни қидириш ишларига Фавқулодда вазиятлар вазирлиги ва Ички ишлар вазирлигининг 29 нафар ходими, шунингдек, 100 нафардан ортиқ маҳаллий аҳоли жалб қилинган.
Хабар қилинишича, бугун қутқарувчилар Фарғона каналида эркакнинг жасади бўлган автомашинани топишган. Марҳумнинг жасади яқинларига топширилган.
