Қирғизистонда сиёсатчилар ва жамоат арбобларидан иборат 75 нафар шахс президент Садир Жапаров ҳамда Жогорку Кенгеш раиси Нурланбек Тургунбек ўғлига мурожаат қилиб, яқин вақт ичида президентлик сайлови ўтказишга чақирди.
Қирғизистонда сиёсатчилар ва жамоат арбобларидан иборат 75 нафар шахс президент Садир Жапаров ҳамда Жогорку Кенгеш раиси Нурланбек Тургунбек ўғлига мурожаат қилиб, яқин вақт ичида президентлик сайлови ўтказишга чақирди.
Уларнинг исм-шарифлари келтирилган мурожаат ижтимоий тармоқларда тарқалди. Унда ҳозирги ҳокимият даврида амалга оширилган ишлар ва айрим камчиликлар ҳақида сўз юритилган. Асосий ютуқ сифатида мамлакатда барқарорлик ўрнатилгани, қўшни давлатлар билан чегара масалалари ҳал этилгани, уюшган жиноий гуруҳлар бутунлай йўқ қилингани қайд этилган. Шунингдек, сўнгги беш йил ичида коррупцияга қарши кураш натижасида давлат бюджетига 352 млрд сом (4,14 млрд доллар) қайтарилгани айтилган.
Шу билан бирга, мамлакатнинг кейинги ривожланишига давлат қарзининг ўсиши, қимматчилик ва ишсизлик тўсқинлик қилаётгани, Қирғизистонни ривожлантириш учун янги рағбат зарурлиги таъкидланган.
Мурожаатда жамиятда Садир Жапаровнинг президентлик муддати масаласи муҳокама қилинаётгани айтилган ва яқин орада сайлов ўтказиш таклиф этилган. Ҳужжатга собиқ бош вазирлар Турсунбек Чингишев, Жанторо Сатибалдиев, Мухаммедкалий Абилгазиев, Кубатбек Боронов имзо чеккан. Шунингдек, собиқ депутатлар Аалы Карашев ва Иса Омуркуловнинг ҳам исмлари келтирилган. Қатор маданият соҳаси вакилларининг ҳам исм-шарифлари бор.
«Азаттиқ» айрим имзочилар билан боғланганида, улар ҳақиқатан ҳам мурожаатга қўл қўйганини тасдиқлашган. Улардан бири — жамоат арбоби Бекболот Талгарбеков бу ташаббусни кўтарганлардан бири эканини айтиб, жамиятда турли баҳслар ва иғвоий ҳаракатларнинг олдини олиш учун президентлик сайлови ўтказиш зарурлигини таъкидлаган.
Бу мурожаатга ҳозирча Садир Жапаров ва Нурланбек Тургунбек ўғли изоҳ бергани йўқ.
Қирғиз жамоатчилигида ижтимоий тармоқлар орқали 2026 йилда президентлик сайлови ўтказиш масаласи муҳокама қилинмоқда. 2021 йилда қабул қилинган Конституцияга кўра, Қирғизистонда президент беш йиллик муддатга сайланади. Бир шахс икки муддатдан ортиқ президент бўлиши мумкин эмас.
Садир Жапаров 2021 йил 10 январда бўлиб ўтган президентлик сайловида ғалаба қозониб, 28 январ куни расман лавозимига киришган.
