Президент Садир Жапаров 16 сентябрда Ўш шаҳар ҳокими Женишбек Токторбаевга қаттиқ ҳайфсан берди. Бу ҳақда Президент маъмурияти хабар қилди.
Давлат раҳбари имзо чеккан фармойишга кўра, юклатилган меҳнат вазифаларини талаб даражасида бажармагани, аниқроғи этика қоидаларини бузгани учун Ўш шаҳар ҳокими Женишбек Токторбаевга қаттиқ ҳайфсан берилган. Хабарда ҳайфсан беришга ҳокимнинг қайси ҳаракатлари сабаб бўлгани кўрсатилмаган.
Ҳукуматдаги айрим манбаларнинг маълумотига кўра, президентнинг сўнгги қарорига ҳоким Токторбаевнинг “Ўш-сити” комплексига борганидаги хулқ-атвори сабаб бўлган.
Ўтган ҳафта охирида “Ўш-Сити” комплекси фаолияти билан танишишга борган Токторбаев қурилиш кечикиб кетаётганини айтган ва ишни олиб бораётган «Бизнес Хаус КЖ» компанияси раҳбарларини давлатдан ташқарига чиқишини чеклашни таклиф қилган.
Президент Садир Жапаров имзо чеккан фармойишга мувофиқ, Жогорку Кенгаш депутати Женишбек Токторбаев жорий йил январда Ўш шаҳар ҳокими этиб тайинланган эди. У хизматга киришган кундан бошлаб шаҳарнинг турли ҳудудларини пиёда айланиб, ноқонуний қурилишларни бузиш ва йўлларни кенгайтириш ҳақида топшириқ бериб келмоқда.
Рейдлар жараёнида ҳоким ўз қўли остида ишлаётган ходимлар, мулк эгалари ва бошқа одамларни кескин танқид қилиши билан ҳам маълум. Айрим ҳолларда у одамларни ҳақоратлагани ёки камситгани тасвирланган видеолар тарқалиб, жамоатчилик муҳокамасига сабаб бўлган.
