Қирғизистон Президенти Садир Жапаров 2 июль куни Москвага қилган ишчи сафари доирасида Россия Федерацияси Президенти Владимир Путин билан тор доирада ва кенгайтирилган таркибда музокаралар ўтказди.
Давлат раҳбарлари икки томонлама кун тартибининг долзарб масалаларини, жумладан, савдо-иқтисодий, маданий-гуманитар ва миграция соҳаларидаги ҳамкорликни муҳокама қилдилар, ҳамда Қирғизистон-Россия стратегик шериклиги ва иттифоқчиликнинг юқори даражасига эришилганидан мамнунлик изҳор этдилар.
Россия Президенти Владимир Путин иқтисодий ҳамкорликдаги ижобий динамикани қайд этди ва икки давлат ўртасидаги товар айирбошлаш ҳажми барқарор ўсиб бораётганини, жорий йилнинг илк ойларида бу кўрсаткич анча ошганини таъкидлади.
У Россия компанияларининг Қирғизистондаги фаолиятини фаол деб баҳолади, ҳамда Россия Қирғизистоннинг етакчи савдо-иқтисодий ҳамкорларидан бири эканлигини яна бир бор тасдиқлади.
Россия Президенти Россия-Қирғиз тараққиёт фонди фаолияти самарадорлигини юқори баҳолади. Мазкур фонд кўмагида Қирғизистон иқтисодий ривожига ҳисса қўшган бир қатор муҳим лойиҳалар амалга оширилди.
У гуманитар соҳадаги, хусусан, таълим соҳасидаги ҳамкорлик муҳим эканини алоҳида таъкидлади. Айни пайтда Қирғизистондаги 43 та мактабда 200 нафар россиялик ўқитувчи фаолият юритмоқда. Рус тилида таълим берувчи мактаблар сонини кўпайтириш режалари амалга оширилмоқда.
Владимир Путин рус тилига Қирғизистон томонидан махсус мақом берилгани учун миннатдорлик билдирди ва бу қадам гуманитар ҳамда иқтисодий соҳаларда ҳамкорликни чуқурлаштиришга хизмат қилаётганини таъкидлади.
У музокара якунида Қирғизистон раҳбарига конструктив мулоқот ва икки томонлама муносабатларни янада мустаҳкамлашга бўлган қизиқиши учун миннатдорлик изҳор этди.
Ўз навбатида, Президент Садир Жапаров ушбу учрашув икки давлат манфаатлари йўлида стратегик шериклик ва иттифоқчилик масалаларини муҳокама қилиш имконини берганига ишонч билдирди.
Давлат раҳбари икки давлат ўртасида тўлиқ ўзаро тушуниш ва ишонч мавжудлигини таъкидлади. Сиёсий қарама-қаршиликлар ва зиддиятлар йўқ.
У энергетика, транспорт, саноат ва қишлоқ хўжалиги соҳаларидаги ҳамкорликни кенгайтириш бўйича катта салоҳият мавжудлигига урғу берди.
Шу муносабат билан у Қирғиз-Россия ҳукуматлараро савдо-иқтисодий, илмий-техникавий ва гуманитар ҳамкорлик комиссиясининг самарали фаолиятини алоҳида таъкидлади.
Музокаралар якунида икки давлат раҳбарлари барча асосий йўналишларда кўп қиррали ҳамкорликни янада мустаҳкамлаш ниятида эканликларини тасдиқладилар.
